Վլադիմիր Պուտինը ԱՄՆ նախագահի հատուկ բանագնաց Սթիվ Ուիթքոֆի և Դոնալդ Թրամփի փեսա Ջարեդ Քուշների հետ Կրեմլում հանդիպելուց երկու օր անց կրկին սպառնացել է՝ Ռուսաստանը կա՛մ ռազմական, կա՛մ այլ ճանապարհով ամբողջությամբ կվերցնի Ուկրաինայի Դոնեցկի և Լուգանսկի մարզերը, այսինքն՝ ամբողջ Դոնբասը:
Հնդկաստան կատարելիք այցից առաջ India Today-ին տված հարցազրույցում Ռուսաստանի նախագահն ընդգծել Է՝ ուկրաինական զորքը ստիպված կլինի դուրս գալ այդ տարածքներից:
«Ամեն ինչ հանգում է դրան։ Կա՛մ մենք ազատագրում ենք այս տարածքները զենքի ուժով, կա՛մ ուկրաինական զորքերը լքում են այս տարածքները և դադարեցնում այնտեղ կռվելը», - ասել է Պուտինը:
Սպառնալիքներին զուգահեռ, Վլադիմիր Պուտինը նաև առաջին անգամ խոսել է Կրեմլի հանդիպման մասին՝ ասելով, որ այն «շատ օգտակար էր»: Կրեմլի ղեկավարն ասել է, որ հանդիպմանն անդրադարձել են ամերիկյան բոլոր՝ 27 առաջարկներին, որոնք ներկայացված էին չորս փաթեթով: Դրանք, ըստ ՌԴ նախագահի, հիմնված էին Ալյասկայի պայմանավորվածությունների վրա, և որոշ հարցերի Մոսկվան համաձայնել է, իսկ մյուսները՝ մերժել: Պուտինը նաև ասել է, որ խնդրի կարգավորումը բարդ է, իսկ Եվրոպան պետք է նպաստի գործընթացին, ոչ թե խոչընդոտի:
Ռուսաստանի Անվտանգության խորհրդի փոխնախագահ Դմիտրի Մեդվեդևն, իր հերթին, հայտարարել է, որ եթե Եվրամիությունն Ուկրաինային «վարկ տրամադրելու քողի տակ գողանա» ռուսական սառեցված ակտիվները, ապա Մոսկվան դա կարող է պատերազմ հրահրելու գործողություն համարել՝ ԵՄ-ի և առանձին երկրների համար դրանից բխող հետևանքներով։
ՌԴ արտգործնախարարության խոսնակ Մարիա Զախարովան էլ զգուշացրել է, որ եթե Եվրամիությունը գնա այս սցենարով, ապա ամենակոշտ պատասխանը կստանա:
«Անշուշտ, մեր պետական պահուստների և ակտիվների հետ կապված ցանկացած անօրինական գործողություն անպատասխան չի մնա։ Մենք դա բազմիցս հայտարարել ենք։ Նման արձագանք կտանք ոչ միայն մենք, այլև, իհարկե, միջազգային հանրությունը», - ասել է Զախարովան:
Ու մինչ Մոսկվան կրկին սպառնում է, Ուկրաինայի գլխավոր բանագնաց Ռուստեմ Ումերովը մեկնում է Միացյալ Նահանգներ՝ հանդիպելու Ուիթքոֆի հետ, որը նրան կներկայացնի Պուտինի հետ դեկտեմբերի 2-ի հանդիպման արդյունքները: Երեկ էլ ուկրաինական պատվիրակության ղեկավարը խորհրդակցություններ է անցկացրել Մեծ Բրիտանիայի, Գերմանիայի և Ֆրանսիայի ներկայացուցիչների հետ:
Ուկրաինայի արտգործնախարար Անդրեյ Սիբիգան ասել է, որ Ումերովը հեռախոսազրույց է ունեցել Ուիթքոֆի հետ, սակայն քանզի սա նուրբ հարց է անվտանգության նկատառումներով, որոշվել է մանրամասները քննարկել դեմ առ դեմ:
«Նրանց գնահատմամբ՝ Մոսկվայի բանակցությունները դրական նշանակություն ունեն խաղաղության գործընթացի համար ... Եվ նրանք ուկրաինական պատվիրակությանը հրավիրեցին առաջիկայում բանակցությունները շարունակել ԱՄՆ-ում», - նշել է Սիբիգան:
Այսօր էլ ԵԱՀԿ նիստին հայտարարել է, որ Ուկրաինան ցանկանում է «իրական խաղաղություն, այլ ոչ թե հաշտեցում» Ռուսաստանի հետ, քանզի խաղաղության անարդար համաձայնությունները աղետի են հանգեցնում:
Չնայած Կրեմլի հանդիպումից հետո Պուտինի օգնական Յուրի Ուշակովը հայտարարել էր, որ փոխզիջումային լուծում դեռ չկա, Դոնալդ Թրամփը հայտարարել է, որ Պուտինի հետ Ուիթքոֆի ու Քուշների հանդիպումը «բավականին լավ» է անցել: ԱՄՆ նախագահը Սպիտակ տանը լրագրողներին ասել է, թե այդ հանդիպումից տպավորություն է ստեղծվել, որ ռուսական կողմը «շատ» է ցանկանում համաձայնության գալ պատերազմը դադարեցնելու հարցում, և հավելել է, որ ամեն դեպքում պարզ չէ, թե ինչ կլինի:
«Նախագահ Պուտինը շատ լավ հանդիպում է ունեցել Ջարեդ Քուշների և Սթիվ Ուիթքոֆի հետ։ Ինչ դուրս կգա այդ հանդիպումից, չեմ կարող ասել, որովհետև համագործակցելու համար երկու կողմ է հարկավոր», - նշել է Թրամփը:
Բրյուսելում երեկ տեղի է ունեցել ՆԱՏՕ-ի անդամ երկրների արտգործնախարարների հանդիպումը, որի արդյունքներով դաշինքի գլխավոր քարտուղարը հայտարարել է, որ դաշնակիցների մեծ մասը՝ երկու երրորդը, պատրաստ է ֆինանսավորել Ուկրաինայի համար զենքի գնումները:
ՆԱՏՕ-ի գլխավոր քարտուղար Մարկ Ռյուտեն հայտնել է, որ երկու երկիր պլանավորում է քննարկել այս հարցը, ևս երկուսը՝ Ավստրալիան և Նոր Զելանդիան, խոստացել են միանալ այդ երկրներին: Ռյուտեի խոսքով՝ դաշնակիցները պլանավորում են մինչև տարեվերջ մոտ 5 միլիարդ դոլարի զենքի մատակարարում ֆինանսավորել:
«Սակայն մենք պետք է ավելին անենք, և բոլոր դաշնակիցները պետք է իրենց ներդրումն ունենան՝ ապահովելու, որ պատրաստ լինենք։ Նաև պատասխանատվությունը պետք է արդարացիորեն բաշխվի», - նշել է Հյուսիսատլանտյան դաշինքի գլխավոր քարտուղարը:
Այս ընթացքում կողմերը շարունակել են հարվածները: Խերսոնում էներգետիկ ենթակառուցվածքներին հարվածների հետևանքով հազարավոր մարդիկ առանց ջեռուցման ու էլեկտրաներգիայի են մնացել: Օդեսայում ռուսական հարվածների հետևանքով վիրավորվել է վեց մարդ, վնասվել է էլեկտրակայան։ Դոնեցկի մարզի Սլավյանսկ (Սլովյանսկ) քաղաքում առնվազն ութ մարդ է վիրավորվել, այդ թվում՝ երկու երեխա:
«Ապակու բեկորները հարվածեցին ինձ։ Ահա արդյունքը: Տեսնո՞ւմ եք: Ես նստած էի աթոռին, և ամեն ինչ ընկավ վրաս։ Բոլոր ապակիները, բոլոր դռները, ամեն ինչ թափվեց վրաս։ Այսքանը», - պատմում է Սլավյանսկի Մարինա անունով բնակչուհին:
«Ես հայ եմ, այստեղ եմ եկել 1988-ի երկրաշարժից հետո։ Այն ժամանակ տունս, ամեն ինչ 10 րոպեում ավերվեց: Այստեղ եկանք երեք երեխայով՝ նրանց այստեղ մեծացնելու։ Սկսվեց պատերազմը, և հիմա ես այստեղ եմ կորցնում ամեն ինչ։ Երկրորդ անգամ եմ անցնում այդ ամենի միջով: Այն ժամանակ երկրաշարժ եղավ, և 10 րոպեում ողջ քաղաքը վերացավ։ Իսկ հիմա դա տեղի է ունենում քիչ-քիչ», - ասում է Սլավյանսկի բնակիչ Ռաֆիկ Կարապետյանը:
Ուկրաինական զինուժն, իր հերթին, հարվածել է ռուսաստանյան մի շարք շրջանների: Ուկրաինական բանակի ղեկավարը հայտարարել է, որ շարունակում են վերահսկողության տակ պահել Պոկրովսկի հյուսիսային հատվածը:
